به گزارش تبریز جوان، علی شهودی شاعر برجسته آذربایجانشرقی شعری در خصوص عید غدیرخم سروده که تقدیم میشود.
حیدری ام من
شاهیمدی علی قنبرینین نوکری ام من
یوخ آیری مرامیم هدفیم حیدری ام من
حیدردی منیم هر ایکی دنیاده امامیم
اولسون اونا هر لحظه درودیله سلامیم
وصفیله معطر اولی پیوسته کلامیم
خوان کرمین نان و نمک پروری ام من
یوخ آیری مرامیم هدفیم حیدری ام من
چون دوتدی علی نین الینی حضرت خاتم
قلبین بورودی بهجت و پایانه یئتیب غم
گویا بئله سویلردی او پیغمبر اکرم
ملک و ملکین گرچی کی پیغمبری ام من
یوخ آیری مرامیم هدفیم حیدری ام من
چون ائیلدی بیعت اسداللهیله مردم
جبریل امین ائیلدی گویلرده ترنم
اکملت لکم دینکم اتممت علیکم
حقین ملک وحیی ، پیام آوری ام من
یوخ آیری مرامیم هدفیم حیدری ام من
چون گئیدی ولایت گئییمین حیدر کرار
جن و ملک و انسه اولوب سرور و سالار
حیدر اوزوده ائیلدی اوز شانینه اقرار
علمین بیلیسیز شهری، نبی دور،دری ام من
یوخ آیری مرامیم هدفیم حیدری ام من
زهرا کی اونون یوخدی بو عالمده نظیری
هر یئرده بیان ائیلدی پیغام غدیری
تک قویمادی بیرلحظه یامان گونده امیری
فخریم بودی سویلردی علی همسری ام من
یوخ آیری مرامیم هدفیم حیدری ام من
نسبتدی بو سوز پادشه کرب و بلایه
اگمز باشینی آل علی اهل جفایه
وورسازدا منیم باشیمی گر نوک جدایه
ای قوم بیلین دین حقین یاوری ام من
یوخ آیری مرامیم هدفیم حیدری ام من
چون عزم نبرد ائیلدی سقای علمدار
آلدی اله غیرت داغی بیر تیغ شرربار
غیضیله دئدی لشکره ای لشکر جرار
سرباز حسینم آغامین نوکری ام من
یوخ آیری مرامیم هدفیم حیدری ام من
یاد اولسون او سرو چمن باغ ولادن
سیراب ائلدی جدی اونی جام بلادن
بیر سس اوجالیب ظهر بلا کرب و بلادن
سسلندی دئدی شبه نبی ، اکبری ام من
یوخ آیری مرامیم هدفیم حیدری ام من
چون جوشه گلیب زینب او خاتون دلاور
شاماتی ائدیب تیغ بیانیله مسخر
وقتی کی دایانمیشدی یزیدیله برابر
سسلندی دئدی کنز حیا گوهری ام من
یوخ آیری مرامیم هدفیم حیدری ام من
چون قویدی قدمگاهه قدم شاه خراسان
حلقه ووروب اطرافینه بیر جمع محبان
زنجیره زرینی ائدیبدیر بئله عنوان
آلله آدی بیر دژدی هدایتگری ام من
یوخ آیری مرامیم هدفیم حیدری ام من
ارزش لی سوز اول سوزدو اولا أَحْسَنُ قَوْلًا
یوخدور من اوچون امر ولایت کیمی اولا
هر دیلده دانیشسامدا علیدور منه مولا
کُردم عربم ترکمنم آذری ام من
یوخ آیری مرامیم هدفیم حیدری ام من
به به گینه یولدان یئتیشیب عید ولایت
شایسته دی بو عیدی گرامی دوتا امت
باغلار بئله گونده هامی پیمان اخوت
گل گل بئله پیمانه بوگون مشتری ام من
یوخ آیری مرامیم هدفیم حیدری ام من
بیزده گلین ای امت فرزانه ایران
تجدید ایلییگ رهبر محبوبیله پیمان
پیمانیمیز اوسته دایاناق وارنقدرجان
رهبر نه بویورسا دئنه فرمانبری ام من
یوخ آیری مرامیم هدفیم حیدری ام من
انتهای پیام/۶۰۰۰۱
ارسال نظر شما
مجموع نظرات : 0 در انتظار بررسی : 0 انتشار یافته : ۰